प्रधानमन्त्रीको सम्पत्ति २ रोपनी जग्गा र ११ लाख नगद

 
२६ पुस, काठमाडौं । प्रधानमन्त्री डा बाबुराम भट्टराईको खोप्लाङ गाविस-४ गोरखामा करिब दुई रोपनीको पैतृक सम्पत्ति छ ।

प्रधानमन्त्री डा भट्टराईले प्रधानमन्त्री तथा मन्त्रिपरिषद्को कार्यालयमा यही पुस ४ गते सम्पत्ति विवरण पेस गर्नुभएको थियो । उहाँको राष्ट्रिय वाणिज्य बैंक भोटाहिटी शाखाका दुई खातामा पारिश्रमिक र भत्ताबापत प्राप्त करिब ११ लाख मौज्दात रहेको जनाइएको छ ।

उहाँका अन्य सम्पत्तिमा किताब र घरायसी सामान रहेका छन्, जसको मूल्य हिसाब गरिएको छैन । प्रधानमन्त्रीले सम्पत्ति विवरणमा ‘पत्नी हिसिला यमि र छोरी मानुषी यमि भट्टराईको छुट्टाछुट्टै नाउँमा करिब मेरै बराबरको सम्पत्ति रहेको’ उल्लेख गर्नुभएको छ । रासस