प्रधानमन्त्रीमा एमालेले ओलीलाई अघि सार्ने : भण्डारी

 काठमाडौं, असार १७ - नेकपा एमालेकी उपाध्यक्ष विद्या भण्डारीले एमालेले सरकारको नेतृत्व गर्ने अवस्था आएमा प्रधानमन्त्रीमा केपी शर्मा ओलीलाई अघि सार्ने बताउनुभएको छ । काठमाडौंमा आइतवार भएको कार्यक्रममा भण्डारीले अध्यक्ष झलनाथ खनाल र वरिष्ठ नेता माधवकुमार नेपाल प्रधानमन्त्री बनिसकेकाले अब पार्टीका नेता केपी शर्मा ओलीलाई प्रधा...नमन्त्रीको उम्मेदवारका रुपमा अघि सारिने स्पष्ट पार्नुभयो । यद्यपी दलहरुले सहमति गरेर प्रधानमन्त्रीको साझा उम्मेदवार तोक्नुपर्ने भण्डारीले बताउनुभयो । ‘हामी कांग्रेस नेतृत्वमै सरकार बनोस् भन्ने चाहन्छौं । डेमोक्र्याटिक एलाइन्स पनि उसकै नेतृत्वमा बन्नुपर्छ भन्ने पक्षमा छौं,’ उहाँले भन्नुभयो ‘काँग्रेसले उम्मेदवार दिन नसके एमालेले केन्द्रीय कमिटीको बैठक राखेर निर्णय दिन्छ ।’
भण्डारीले प्रधानमन्त्री बाबुरामलाई हटाउन राष्ट्रपतिले हिम्मत गर्नुपर्ने पनि बताउनुभयो । ‘राष्ट्रपतिले प्रधानमन्त्रीलाई बर्खास्त गरेर नयाँ सरकार बनाउन पहल लिनुपर्छ,’ उहाँले भन्नुभयो ‘बाबुरामजी जति अटेर गरेर बस्नुहुन्छ, उहाँका लागि त्यति नै प्रत्युत्पादक हुन्छ ।’

काँग्रेस–एमाले बैद्यसँग मिल्नुपर्छः पोखरेल

बुटवल, असार १७ – नेकपा एमालेका सचिव शंकर पोखरेलले मोहन वैद्यसँग मिलेर कांग्रेस, एमालले राष्ट्रलाई निकास दिनुपर्ने बताउनु भएको छ । प्रेस चौतारी रुपन्देहीले आइतबार बिहान बुटवलमा गरेको पत्रकार सम्मेलनमा उहाँले मुलुकको निकासका लागि वैद्यले नेतृत्व गरेको नेकपा माओवादीसँग मिल्नुपर्ने बताउनु भएको हो ।

माओवादी विभाजित भइसकेको र प्रचण्ड, बाबुराम सर्वसत्तावादको दिशातर्फ उन्मुख भइरहेकोले बैद्यसँग मिलेर सरकार बिरुद्ध कार्यक्रम गर्नुपर्ने बताउनुभयो । पोखरेलले प्रमुख दलहरुको सहयोगमा राष्ट्रपतिले पहलकदमी लिनुपर्ने बताउनु भयो ।

अब विकासमा ध्यान दिऔँ: नेता देउवा

काठमाडौ, असार १७ -
पूर्वप्रधानमन्त्री तथा नेपाली काँग्रेसका वरिष्ठ नेता शेरबहादुर देउवाले मुलुक संवैधानिक प्रयोगशाला मात्रै बनेकाले छिटो लोकतान्त्रिक संविधान निर्माण गरी आर्थिक विकासमा ध्यान दिइनुपर्ने बताएका छन् ।
प्रजातन्त्र सेनानी स्वर्गीय रामचन्द्र जोशीको प्रथम वार्षिकीका अवसरमा रामचन्द्र जोशी स्मृति सेवा केन्द्रद्वारा आईतवार यहाँ आयोजित ‘लोकतन्त्रका चुनौती र राजनीतिक निकास’ विषयक विचारगोष्ठीमा बोल्दै उनले अहिलेसम्म मुलुकलाई संविधानको प्रयोगशाला मात्र बनाइएकाले विकास हुन नसकेको बताए ।
वरिष्ठ नेता देउवाले निर्वाचन मुलुकको निकासका लागि अन्तिम विकल्प भएपनि चार वर्षमा संविधान लेखनका लागि भएका सहमति र बाँकी रहेका मुद्दा संविधानसभालाई छोटो समयका लागि ब्युँताएर छिनोफानो गरिए उपयुक्त हुन्छ भने ।
फेरि संविधानसभाको निर्वाचन गरिए ठूलो आर्थिक व्ययमात्र हुने उनको भनाइ थियो ।